Sina lē ’a vele

Sāmoa e, ua lava, Ou tala le ‘apa
E ui ina lavāsῑa, Togafau e manino lava
Tālagi soifua, e iloga lāvā ‘afa
Ō Sina lē ’a vele, le sili’āga i fa’atūfugaga
Tala o lē amatāga, Le faia o le foāfoāga
Na nunumi mea uma, Ua na’o le ta’aiga o kasa
Na fegaoia’i, Le Atua i le agaga
Tu’u mavaevae le pouliuli ma le malamalama
Ō Sina lē ’ā vele, nai le papa i Galagala
Na peleple le ala i le fau i Sagana
Ola i pa’i i ō la lima, i le fe’e mana
Sāua ai le Vailepa so’otama Atua ma tagata
Le fe’e lea ua teva, ua to’atama’i
Ua lāfoa’i i le sami ona fa’atuati
To’a le vaivati, ala o āpiāpi
Galoma ‘oa Laloata, ma’alo’alo toe ma’ani’ani
Samoa e, ua tafa, Ata i lē tafeaga
Na fesapoa’ina e pule’ava māgafagafa
O fea lau fa’ato’a ai le malamalama
Ō Sina lē ’a vele, tatago ai ma fofoga le toafa
Ō Sina lē ’a vele, nai le papa i Galagala
Na pelepele le ala i le fau i Sagana
Ola i pa’i i ō la lima i le fe’e mana
Sāua ai le Vailepa so’otama Atua ma tagata
Samoa e, fa’āmaela, Le fua ua fa’alepa
Ua e inu malie, ua e taumafa i vai lele’a
Ua e māepa, ua tuana’i Afega
Ō Sina lē ’a vele, na mua’i tutu ai lamepa
Samoa e, me’eme’e, i le malamalama
Sa taupulapula, lē vaoa pei o ni ‘alafa
Le palepale o tama, Asaliga su’o ala
Samoa e, ua ē, ‘oloa lu’ulu’u i pulu pasama
Ō Sina lē ’a vele mai le ūlu papa
Na pelepele le ala i le fau i Sagana
Ola i pa’i i ō la lima i le fe’e mana
Sāua ai le Vailepa so’otama Atua ma tagata
Sāmoa e, ua mamala, Ta te le matanana
O Sina lē ’a vele, na mafoafoa ai lālāma
Na ‘e se’i le ma’ali, Ma le pa’u o toafa
Ma si au fa’asolo, O lē sinano le fua o le fasa
Tasi iva, iva ono, Ua ulufale tausala
Ua ‘e sui o le lou, Pe ‘a fotu le isi fuata
‘Ie lanulau’ava, le sei pua a le mana
Ma le ‘ulasisi sāmasāma, Mai le Alamoana
Ō Sina lē ’a vele, Nai le vai o tausala
Na velevele le ala i le fau i Sagana
Ō Sina lē ’a vele, Nai le vai o tausala
Na velevele le ala i le fau i Sagana
Ola i pa’i i ō la lima i le fe’e mana
Sāua ai le Vailepa, so’otama Atua ma tagata
Ō Sina lē ’a vele, mai le ūlu papa
Na velevele le ala i le fau i Sagana
Ola i pa’i i ō la lima i le fe’e mana
Sāua ai le Vailepa, so’otama Atua ma tagata
Ola i pā’i i ō la lima i le fe’e mana
Sāua ai le Vailepa, so’otama Atua ma tagata