Sulu i le Papa Gagala

Maniuniu e le popo pei o le upu i le fa’alolo
Samoa e, ua ao i le poto
Ou te le tau fa’ailoa o lau vaai ma lau fa’alogo
Ou te ta’utino atu lava oute feololo
Ta te le fa’amalimali, Samoa e ua e niu ali
Le ava ma lona siliaga o a’u totino a’ia’i
Feausi mai ma tama’ita’i, vaaia ma ala e uli ma toto a’i
Ma i iole niniva ua vili tau i lona tumua’i
Niniva ma Punialava’a ua e masani
O le ele’ele lena atoa ma le sami
Ou te le tau fa’aali ua iloa a e le lalolagi
E, Punialava’a na e taeao lasi
Ou te le fatufatu tala, e alalaga mai lava o ma’a
Sulu i le papa gagala
Na leo e le siapo gagana
O le vai lena o tausala
Sina le tetea na fa’alala tama
Na elei tino toto o taulaga palu ai o le lama
Ta te le fa’a’ala’ala pe toe si’i se mata lalaga
O lau pule o le fa’atupugā ava ati mamala
Le nu’u o aitu tagata,
iole, fe’e, tuna ma le ve’a faitama,
Le moa ula moa ta’a e vivini na pupuni le alava’a
Ta te le fia aniani na’o le tafili ma fa’aaviavi
Samoa e, o Ti’iti’iatalaga lava na na fasi
E sauai sa nofo i le efu
O nivaniva sa pulea o le afi
Aumai i le mauga fiafia ua fa’avela ai tausami
E, Punialava’a ta savalivali
E, Punialava’a na e taeao lasi